پاکستان سپر لیگ 10 کا پلیئرز ڈرافٹ آج لاہور میں ہوگا

لاہور: پاکستان سپر لیگ (پی ایس ایل) کے 10ویں ایڈیشن کا پلیئرز ڈرافٹ آج لاہور کے حضوری باغ میں منعقد ہوگا، جہاں ایونٹ کی چھ فرنچائز اپنی اپنی ٹیموں کی تشکیل کریں گی۔

دنیا بھر سے کئی معروف کرکٹرز پی ایس ایل 10 میں رجسٹرڈ ہوگئے ہیں، جن میں نیوزی لینڈ کے کین ولیمسن، ڈیرل مچل، ٹم ساؤتھی، مارک چیپ مین، اور آسٹریلیا کے ڈیوڈ وارنر، عثمان خواجہ، میتھیو شارٹ، شان ایبٹ شامل ہیں۔ ان کے علاوہ انگلینڈ کے جیسن رائے، ایلکس ہیلز اور زیک کرولی بھی پلاٹینم کیٹگری میں شامل ہیں۔ بنگلا دیش کے مستفیض الرحمان، شکیب الحسن اور افغانستان کے مجیب الرحمان سمیت دیگر غیر ملکی کھلاڑی بھی ڈرافٹ کا حصہ ہیں۔

پی ایس ایل 10 کیلئے فرنچائزز نے اپنے اسکواڈز کو حتمی شکل دینے کی تیاریاں مکمل کرلی ہیں۔ کراچی کنگز، پشاور زلمی اور ملتان سلطان نے 7،7 کھلاڑیوں کو ریٹین کیا ہے، جبکہ لاہور قلندرز، اسلام آباد یونائیٹڈ اور کوئٹہ گلیڈی ایٹرز نے 8،8 کھلاڑیوں کو برقرار رکھا ہے۔

آج ہونے والے ڈرافٹ میں فرنچائزز کو اپنے اسکواڈز کو مزید مستحکم کرنے کا موقع ملے گا، اور اس کے بعد پی ایس ایل 10 کی تیاریوں میں تیزی آئے گی۔